پاکستان میں وزارت خارجہ اور اقوام متحدہ کے اداروں کے زیراہتمام 76ویں اقوام متحدہ ڈے پرشاندار تقریب کا اہتما م

اقوام متحدہ کے قیام کی 76ویں سالگرہ کی شاندار اور پروقار تقریب پاکستانی وزارت خارجہ کے زیراہتمام  اقوام متحدہ ریزیڈنٹ آفس  اسلام آباد کے تعاون سے منعقد ہوئی۔ پاکستانی سیکرٹری خارجہ جناب سہیل محمود تقریب کے مہمان خصوصی تھے۔ تقریب میں سیکرٹری جنرل اقوام متحدہ  انٹونیو گوتیرس کا خصوصی ویڈیو پیغام بھی سنوایا گیا۔ اقوام متحدہ کے پاکستان میں ریزیڈنٹ کوارڈینیٹرجولیان ہارنیس نے تقریب کے شرکاء سے خطاب کیا۔ شرکاء میں ڈپلومیٹک مشنز کے سربراہان، اقوام متحدہ کی مختلف ایجنسیوں کے سربراہان، سینئر حکومتی حکام اور اقوام متحدہ کا عملہ شامل تھا۔

اس موقع پر اپنے خطاب میں سیکرٹری خارجہ سہیل محمود نے کثیرالجہتی دنیا کے لیے پاکستان کے عزم کا اعادہ کیا، ایک ایسی دنیا جس  میں اقوام متحدہ کی زیرنگرانی  قیا م امن ،سکیورٹی،ترقی اور  انسانی حقوق کے تحفظ کو ممکن بنایا جاسکے۔

سیکرٹری خارجہ نے اقوام متحدہ  کے پلیٹ فارم سے قیام امن، مہاجرین کے تحفظ، ماحولیاتی تبدیلی ، انسانی بنیادوں پر کارروائیوں اور پائیدار ترقی  کے لیے عالمی کاوشوں میں پاکستان کے کردار پرروشنی ڈالی۔ انہوں نے پاکستان  کی  سماجی و اقتصادی ترقی کے لیے کردار ادا کر نےوالی اقوام متحدہ کی تمام ایجنسیوں کا شکریہ اداکیا۔

اقوام متحدہ کے ریزیڈنٹ کوارڈینیٹرجناب جولیان ہارنیس  نے مسلسل مدد اور معاونت  پر پاکستانی حکومت کا شکریہ اداکیا۔ انہوں نے پاکستان میں مختلف شعبوں میں اقوام متحدہ کی ایجنسیوں کی جانب سے حاصل کی گئی کامیابیوں پرروشنی ڈالی۔ انہوں نے اقوام متحدہ پائیدارترقی فریم ورک برائے 2023-2027  کے نئے پنج سالہ منصوبے  کے نمایاں خدوخال بھی بیان کیے۔ انہوں نے بتایا کہ  کس طرح ہرممکن کوشش کی گئی کہ اس فریم ورک میں حقیقت پسندانہ ایکشن پلان بنایا جائے  جو پاکستانی عوام کی ضروریات ،حکومتی ہدایات ،رکن ممالک اور ترقیاتی شراکتی داروں  کی توقعات سے مطابقت رکھتا ہو۔

تقریب میں شریک نوجوانوں کے ایک نمائندے نے عصرحاضر کے چیلنجز سے نمٹنے کے لئے اقوام متحدہ  سے وابستہ توقعات پرروشنی ڈالی۔

اقوام متحدہ کے مختلف اداروں نے صحت،غذائی تحفظ، ماحولیاتی تحفظ،استعدادکاربڑھانے، سماجی و اقتصادی ترقی جیسے شعبوں میں پاکستان میں اپنی خدمات اور مصنوعات  کی نمائش کے لیے تقریب  میں مختلف  ڈسپلے سنٹرزقائم کیے۔ ان اسٹالز یا ڈسپلے سنٹرز میں شرکا نے گہری دلچسپی کا اظہار کیا۔اس سے انہیں پاکستان میں اقوام متحدہ کی خدمات اور کامیابیوں  کے حوالے سے جاننے کا اچھا موقع ملا۔

فوٹوکریڈٹ:یواین ڈی پی