میڈیا اپ ڈیٹ: اقوام متحدہ پاکستان، 25 نومبر 2022

خواتین پر تشددکا خاتمہ  وقت کی ضرورت ہے، یو این ایف پی اے

25نومبر2022:   خواتین پر تشدد دنیا بھر میں کی جانے والی انسانی حقوق کی سنگین ترین خلاف ورزیوں میں سے ایک ہے۔ تشدد سےمتاثرہ خواتین کی زندگیوں اور صحت و سلامتی کو خطرات لاحق ہوجاتے ہیں۔ پاکستان میں 32 فیصد خواتین کو تشدد کا سامنا رہاہے ۔ ان میں سے نصف خواتین نے کبھی مدد نہیں مانگی اور نہ ہی کسی کو اپنے اوپر ہونے والے تشدد کے بارے میں آگاہ کیا ۔ اعداد و شمار خواتین پر گزرنے والی تکالیف اور نقصان کا احاطہ نہیں کرسکتے البتہ متاثرہ خواتین کی کہانیاں اس کی عکاسی کرتی ہیں۔

صنف کی بنیاد پر تشددحقیقی دنیا سے لے کر ڈیجیٹل پلیٹ فارمز تک، جسمانی، جنسی، نفسیاتی اور آن لائن تشدد سمیت مختلف خوفناک شکلوں میں ظاہر ہوتا ہے۔ ہر قسم کا تشدد متاثرہ خواتین  کی جسمانی اور ذہنی صحت کو متاثر کرتا ہے، اور ان میں  اضطراب ، افسردگی ، خودکش خیالات یا طرز عمل ، اور پوسٹ ٹرامیٹک اسٹریس ڈس آرڈر (پی ٹی ایس ڈی) کا سبب بن سکتا ہے۔ اس کے علاوہ تشد د سے متاثرہ خواتین  اپنی انفرادیت ، وقار ، یا عزت ِ نفس  کا احساس کھو سکتی ہیں۔

موجودہ دور میں تشدد کی سب سے عام قسم ’ڈیجیٹل تشدد‘ یا خواتین اور لڑکیوں کا آن لائن دنیا میں ہونے والا استحصال ہے۔ ڈیجیٹل تشدد میں آن لائن جنسی ہراسانی ،  ڈرانا دھمکانا اور دوسروں کی تصاویر اور ویڈیو کا  اُن کی رضامندی کے بغیر منفی  استعمال شامل ہے۔  عالمی سطح پر 85 فیصد خواتین نے ڈیجیٹل تشدد کا مشاہدہ کرنے کی اطلاع دی ہے، اور تقریبا 40 فیصد کو  ذاتی طور پر اس کا تجربہ ہوا ہے۔ آن لائن پلیٹ فارمز پر  خواتین سے نفرت انگیز اور  توہین آمیز سلوک ان میں طویل مدتی نفسیاتی ، جذباتی اور جسمانی پریشانی اور اضطراب  کا سبب بنتا ہے۔ عالمی اعداد و شمار کے مطابق دس میں سے نو عورتوں (92٪) کا کہنا تھا  کہ آن لائن تشدد ان کی صحت و سلامتی  کے احساس کو نقصان پہنچاتا ہے اور ایک تہائی سے زائد (35٪)  عورتوں کو آن لائن تشدد کی وجہ سے ذہنی صحت کے مسائل کا سامنا رہا ۔ ڈیجیٹل تشدد پیشہ ورانہ  امور اور روزگار کے لیے  آن لائن اور سوشل میڈیا پلیٹ فارمز  پر انحصار کرنے والی خواتین اور لڑکیوں کے کام پر بھی منفی اثر ڈالتا  ہے۔

خواتین اور لڑکیاں چاہے جہاں کہیں بھی ہوں، تمام جگہوں پر تحفظ کا احساس ان کا حق ہے۔ خواتین پر تشدد کے خاتمے کے عالمی دن کے موقع پر  صنفی بنیادوں پر تشدد کے خلاف ایک 16 روزہ مہم  کا آغاز کردیا گیا ہے۔ اب وقت آگیا ہے کہ ہر کوئی اس بات پر غور کرے کہ صنفی بنیادوں پر ہونے والے  تشدد کو کیسے ختم کیا جاسکتا ہے۔ اس مہم کے ذریعے  یو این ایف پی اے دیگر شراکت داروں کے ساتھ مل   کر صنفی بنیاد پر تشدد،  کم   عمری کی شادیوں اور دیگر نقصان دہ رویوں کے خاتمے کے لیے آگاہی کے فروغ، حمایت کے حصول  اوردیگر عملی اقدامات  کے ذریعے کوششیں کررہا  ہے۔

یو این ایف پی اے  2030 تک صنفی بنیاد پر تشدد کے خاتمے کے لیے پرعزم ہے جس کے لیے ادارے کی جانب سے  خواتین اور لڑکیوں کو ان کی صحت اور حقوق کے بارے میں معلومات فراہم کی جا  رہی ہیں؛ اور  صنفی تشدد کے نقصانات کو اجاگر کرتے ہوئے مردوں اور لڑکوں کے رویوں کو تبدیل کرنے لیے ان کے ساتھ مل کر کام کیا جارہاہے۔ اس کے علاوہ یو این ایف پی اےصنفی بنیادوں پر تشدد سے متاثرہ خواتین کو  طبی نگہداشت ، قانونی تحفظ اور نفسیاتی  مدد   کی فراہمی میں معاونت اور ساتھ ہی تشدد سے متاثرہ خواتین کو  مضبوط قانونی تحفظ مہیا کرنے کی حمایت کررہا  ہے  ۔

مزید معلومات کے لئے رابطہ کیجیے:

مریم نواز، کمیونیکیشن تجزیہ کار، یو این ایف پی اے پاکستان،     mnawaz@unfpa.org

پیلیرانی سیموبندا، کمیونیکیشن اسپیشلسٹ semu-banda@unfpa.org